港島粥記海鮮火鍋 (Closed)

本身同朋友約出黎食飯仲諗緊食咩，就見到呢間海鮮火鍋做緊198蚊試食價，咁難得會有咁平價既海鮮火鍋就入左去試！店鋪新開環境好乾淨舒服，平日夜晚咁啱唔洗等位就入得，落單之後一碟碟海鮮好快就送到！相裡面係5人份海鮮，有沙白、白蜆、鮮元貝、鮮鮑魚、海蝦同肉蟹。份量好足同新鮮，海蝦仲好生猛！整體海鮮質素都好有驚喜size都好大隻，海蝦爽口、蟹肉嫩滑、鮑魚彈牙，其他都好鮮甜！ 叫左一jar竹蔗茅根，店員即刻介紹係佢地自己煲既，味道清清地比較健康。另外嗌左份蝦餅，食落去都ok爽口，但我覺得芫荽味淡左d~ 食完海鮮，店員就將A4和牛、豬腩肉、豬梅肉同其他蔬菜上碟。本身對和牛冇太大期望(因為係贈送)，但一食入口發現真係好滑好有牛味！仲以為食完海鮮可能之後既食物質素都係普普通通，但連牛、豬都好好味，而蔬菜方面蜂巢豆腐出色！食埋肉、菜之後，店員就即刻攞埋粥底配南瓜同芋頭出黎加落火鍋煮，不過我個人覺得冇需要再落，因為成鍋粥已經好足料，同想保留返海鮮既鮮甜味。整體海鮮都好新鮮冇雪藏味，野食份量好夠，店員服務好快同地方環境都乾淨。試食價真係超值，有機會都會再幫襯！