跑緣 (Moved) New Location

跑緣應該係全港唯一一間以跑步為主題嘅 cafe，老闆係 68 歲嘅牧師 Dino。有宗教背景，可想而知 cafe 除咗做生意之外，亦都會參與社區服務，例如售賣飯券，派飯畀無家者等，可謂又黃有又有良知。既然以跑步為主題，店內嘅裝飾同擺設當然同呢個主題有關，例如：放咗一啲有關跑步嘅書籍供食客借閱讀；整咗一幅貼有跑手號碼布嘅牆，前面仲掛滿獎牌。除此之外，由於 Dino 亦有開班教授養生跑，所以店內有一幅牆畫咗佢嘅跑步四式心得，圖文並茂，資訊與趣味並重。叫咗個意式香辣蝦意粉，原先估計係茄醬同 Tabasco 味為主，點知上枱時先發現原來係creamy 嘅蕃茄醬汁。由於叫咗少辣，辣味真係一瞬即逝😂，不過整體嚟講，個意粉酸酸甜甜，配以洋蔥同蝦仁，再加上旁邊嘅沙律，味道係唔錯嘅。Dino 話大廚姨姨以前係社工，真係失敬失敬。再叫咗杯 Dirty (Dino 牧師 Special)，採用嘅係明治奶，奶味好濃，本來並唔係我鍾意嘅口味，不過由於咖啡味都好濃，成杯咖啡因而取得平衡，好飲👍。據 Dino 講，咖啡用咗哥倫比亞豆，份量又由 18 gram 增加到 21.6 gram，所以果酸味少咗，咖啡味濃咗。