西貢餐室

Open Now

Now Closed

假日離開西貢巿中心揾食，行去翠塘停車場嗰邊，趕緊喺四點收舖前嚟到落單：肉碎飯、蝦醬炒飯、餃子、叉蛋飯同鹹檸梳打。大廚喺開放式廚房一放蝦醬落鑊，全間舖的人即時呼吸同一味道。炒飯夠鑊氣，蝦醬咁惹味，自然越食越想食；肉碎夠辣有迷人香葉味，泰風味十足。餃子饀加咗金不換，清香，點埋個醬嚟食，味道上非常有自家特色，係一種會令你記住的美味，好彩有叫到呢碟餃子；叉蛋飯足料，豉油唔死鹹，蛋炒得剛好，唔會太生又唔太老。食咗咁多味道，飲啖鹹檸梳打中和吓就最適合，個鹹檸齋食唔好味，配梳打反而有化學作用，兩個超啱key。地方細細卻坐滿街坊，點可能錯過。