Video
Read full review
2014-07-28
6435 views
「小確幸」一詞嚟自村上春樹嘅散文集「蘭格漢斯島的午后」，雖然小弟才疏少睇書，不過，都知道小確幸嘅意思 - 一種微小而確實嘅幸福。今日嚟到饒宗頤文化館內嘅銀杏館嘆下午茶，同樣，有著一份豐滿嘅小確幸。我見之前有啲食評都有介紹饒宗頤文化館，所以，小弟都無謂多費唇舌「抄」一次，有興趣不妨上官網睇睇就一目了然（www.jtia.hk）。整個建築群話大唔大，話細唔細，而銀杏館位處「中區H座」（饒宗頤文化館分為上、中、下3區），總之唔難搵，整座兩層高平房建築，頭尾兩側漆上白色嘅水泥牆，中間為紅磚牆，如果成幢都喺紅磚牆你話幾特別呢！銀杏館開放嘅時間都幾長，星期一至日，朝7:30至晚10:00，一早都營業，皆因為住晌上區「翠雅山房」嘅住客提出早餐，「翠雅山房」並非青年旅舍，官網定性為文化旅館，除晌官網訂房，亦晌一啲酒店網都可以訂住。有興趣嚟到依度有百年歷史、被列為香港三級歷史建築嘅文化旅館嗎？入到餐廳內部，其實跟去一般西餐廳無異，半開放式廚房，帶點雅氣嘅木枱木櫈，人少可選擇4、6人長枱，人多揀大圓枱方便傾偈交談。用餐以外，仲有少部份零售產品直接出售，如自家製有機菜脯、有機果醬。而樓上設為「宴會廳」，平日
我見之前有啲食評都有介紹饒宗頤文化館，所以，小弟都無謂多費唇舌「抄」一次，有興趣不妨上官網睇睇就一目了然（www.jtia.hk）。整個建築群話大唔大，話細唔細，而銀杏館位處「中區H座」（饒宗頤文化館分為上、中、下3區），總之唔難搵，整座兩層高平房建築，頭尾兩側漆上白色嘅水泥牆，中間為紅磚牆，如果成幢都喺紅磚牆你話幾特別呢！
銀杏館開放嘅時間都幾長，星期一至日，朝7:30至晚10:00，一早都營業，皆因為住晌上區「翠雅山房」嘅住客提出早餐，「翠雅山房」並非青年旅舍，官網定性為文化旅館，除晌官網訂房，亦晌一啲酒店網都可以訂住。有興趣嚟到依度有百年歷史、被列為香港三級歷史建築嘅文化旅館嗎？
入到餐廳內部，其實跟去一般西餐廳無異，半開放式廚房，帶點雅氣嘅木枱木櫈，人少可選擇4、6人長枱，人多揀大圓枱方便傾偈交談。用餐以外，仲有少部份零售產品直接出售，如自家製有機菜脯、有機果醬。
而樓上設為「宴會廳」，平日一般都唔開放，主要用作私人派對，包場活動，不過，佢又無乜攔住，所以都走上去望一望，一望個格局就明顯跟樓下唔同。
由於位置有少少隔涉，早、午、茶市人客唔太多，就算無訂位直接嚟到摸門釘嘅機會都好細；相反，晚市（尤其周六）就建議訂座，唔好搏，因為幾多客人專程走過嚟慢食，兼懷舊一吓一啲經典音樂，晌度每晚都有唔同樂隊，奏出經典懷舊音樂，實行與眾同樂，樂韻飄揚。
枱上嘅餐墊有晒「銀杏館」依間社企嘅介紹、理念，都一樣廢話少講。簡單而言，中環銀杏館以西餐為主，太子銀杏館以中餐為主，饒宗頤嘅銀杏館就二合為一，有中有西。盡量採用本地有機食材，支持本土出產，貫徹低碳飲食主義。
未點餐，已注意到枱上一大壺π水，「π水」喺乜，或許你都曾經聽過，因為有親友都裝咗依個過濾系統（印象中要成萬幾蚊架），小弟都略知一二。未聽過都唔緊要，又喺看圖識字嘅時間，簡單而言，算喺一種接近生命體嘅水，姑勿論你信唔信都好，飲多啲水對身體都喺好嘅，尤其大熱天時嘛！
下午茶餐嘅餐單，由A至H共6款，價錢由$28到$38，包一杯熱飲，另收加一服務費。
C. 有機香茅豬扒包 $38包底用「脆豬」，外層非常脆口，內裡都挺軟熟；而豬扒有成兩大塊之多，又幾厚身，份量十足，幾夠肉汁，更加份大量洋蔥，啱晒我啦，淋上帶點微酸嘅沙律汁，整體味道幾好。不過，美中不足喺香茅味未夠突出，而其中一塊豬扒又黐住一大截肥膏。
F. 有機香茅雞扒出前一丁 $38啲雞扒比起豬扒入味啲，香茅味較為明顯，而且，俾到兩大件雞扒，真喺當正餐食都得；雞扒仲去咗皮，又加幾炷菜，咁就更加健康啲。
熱飲就梗喺只可揀普通一般嘅茶啡、檸茶檸水……，意大利泡沫咖啡或鮮奶咖啡都要加錢，不過，一啲有機花茶蜜卻又唔使加錢喎，既特別，又有益，咁自不然喺我哋嘅必選。
有機紅菜頭蜜紅菜頭一向俾人印象都喺血紅一片，但點都估唔到杯紅菜頭蜜喺泥黃黃哋色，飲落又確有少少紅菜頭味，又唔會太甜，不過，當然跟飲紅菜頭汁會有好大分別。
有機洛神花蜜除紅菜頭蜜、橘子蜜、薄荷蜜，仲有就喺依杯有機洛神花蜜，色澤透紅，味道酸酸甜甜，就算熱飲，令人感覺都幾清新。
嚟到饒宗頤文化館嘆下午茶以外，無理由唔周圍行吓嘅，少少上、中、下3區環境相片跟大家分享吓！上區
中區
下區
點解會晌文首講晌度只喺食個下午茶都喺種小確幸，雖然小弟離退休仲有好長路要走，但見晌度工作嘅長者，敬業樂業，好證明自己嘅能力，一份工作、一份尊重可能對佢哋嚟講都喺一種小確幸！回想自己，雖然仍要辛勤工作，至少唔使為五斗米折腰，有自己嘅小蝸居，星期六可以嘆吓下午茶，不論大小，「確幸」隨時都晌你身邊！
Post
