軟橋米苔目餐廳 (Moved) New Location

不嬲都知深水埗好多好野食，平時多數去某幾間好多人排隊既老店，今日想試下新野，見到呢間小店睇落都好吸引。而且雖然聽過，但未試過米苔目，一於試下先。一入到去，老闆娘就好有禮貌咁介紹野食，非常熱情，果然小店就係人情味最多。佢既米苔目有好多唔同既餸，唔膽既湯底揀，睇到我花多眼亂呀。我就叫左個韭菜餃，絲瓜，海帶，牛肉米苔目。一上台就見到成碗超豐富啦，牛肉好重牛味，又唔會太硬。韭菜餃都好正，個皮夠薄，入面既韭菜都好香。原來米苔目係好似銀針粉同狗仔粉咁一條條，但係口感有啲唔同，咬落比較有層次感，食落更好味，襯埋個湯底簡直一流呀。呢碟麻辣牛肉又係超香口，辣得岩岩好。而且佢既辣味唔會蓋過左牛本身既味，食落勁開胃呀。蒜泥白肉都好出色，夠蒜，而且肉切得夠簿。雖然食完會成口蒜味，但都忍唔住食哂呀。呢個皮蛋又係好夠味，食落味道岩岩好。呢間餐廳真係又平又好味，勁平既價錢就有一流既食物同服務，老闆娘同員工既態度都勁好，呢d就係小店應有既人情味！決定下次一定會再黎食，真心推薦大家黎試下呀。