澳門翠苑餐廳

Open Now

Now Closed

平時出旺角都係食拉麵、放題，估唔到旅遊區都重有傳統街市式熟食中心。今日K先生要去旺角買模型材料，順道黎呢間我恨左好耐既餐廳食（話說K先生成日都話我身為女仔，竟然唔鍾意食西餐，而係會食大排檔、街邊小食）去到既時候係12點左右，成個熟食中心都好多人😮連著西裝既男仔都有，睇黎呢個熟食中心都好受周邊打工仔既歡迎。所以係lunch time黎到既我地要搵左一陣先有位，而且一定要搭枱。一入熟食中心第一間就係澳門翠苑餐廳，亦都係我既目標不作他想，立即叫左最出名既咖哩牛腩農夫包！收左錢之後，職員會比個牌仔比你，搵左位之後放係枱面，職員就會送餐過黎。由於農夫包即叫即焗，要等大約10分鐘。一黎到既時候，我有少少嚇親因為成個包好似mini南瓜咁大，旁邊重有咖哩汁同羅宋湯跟埋（重點我一個人食哂🙄）整個農夫包焗得好脆，但又唔會燶餐廳比埋膠手套我地去摵個包，細心農夫包入面有6，7舊牛腩，2舊牛筋，全部都炆得好淋。原本以為咖哩牛腩係平時食果種，原來牛腩係清燉，再額外跟咖哩汁，應該係防止咖哩汁整淋個包。用個麵包頂點左咖哩汁試，估唔到望落咖哩係港式偏黃，食落卻似印度式，即係有辣度並帶有香料味，而且都好稠身，沾包食一流。