醉鍋 (V Point)

Open Now

Now Closed

寒流又襲港，個腦唯一諗到就係打邊爐啦。撞正收工時間，地鋪人頭湧湧，咁啱比我揾到間樓上火鍋鋪，地點又方便，即刻去試下！店舖走中國風路線，裝修古色古香，仲有個無敵大海景。坐低望下餐牌就點左個招牌醉火入鍋湯底，店員介紹係必食之選，決定試下佢。鍋鍋分成五格，五種唔同既湯底。中間係鮮蝦木瓜鍋，店員仲會仲將一壺酒倒落去點火，極具娛樂性！其他仲有蕃茄波士頓龍蝦湯，大大隻龍蝦，蕃茄味足。四川麻辣鍋，辣得來夠哂麻，惹味！清湯蘿蔔牛腩鮮甜，胡椒味夠。最特別係用馬來肉骨茶來打邊爐，真係第一次見！叫左個掛架安格斯牛小排，架下面仲有冰雪住，牛味濃，用邊個湯底淥都好好食。手打蝦丸同墨魚丸大大粒，食落蝦味墨魚味十足，非常足料。黑松露蝦蟹餃又係必點，黑松露味好香，又係啖啖蝦肉，正。打邊爐當然唔少得響鈴，呢度響鈴即炸，熱辣辣脆卜卜，好香口惹味。最後來個三色鮮製生麵作結，三種麵顏色鮮艷，分別加入菠菜，甘筍同墨汁，各有自秋。食完麵就啱啱好，捧住個肚舒舒服服走人，又唔使同人迫，值得推介。