紅茶冰室 (Closed)

之前同老婆係荃灣食過芝士流心西多士，覺得好好食。但呢啲咁肥嘅野，老婆話唔可以成日食。今早瞓醒，老婆竟然主動話想食。但無理由山長水遠走去荃灣，於是上網睇下，竟然見到觀塘都開咗間。呢間冰室都幾大，但入面都幾爆場。係觀塘區呢啲工廠大廈，星期日都咁爆，証明都有唔少捧場客。邪惡芝士流心西多士 $30 - 西多士即叫即整，熱辣辣。一刀切落去，邪惡嘅芝士就湧出黎。淡淡芝士味，再同牛油、煉奶一齊食，真係令人回味。芝士炒蛋魚柳包伴薯皇 $37 - 薯皇就普普通通，唔太突出。而魚柳好脆口，雞蛋嫩滑，再加埋芝士、蕃茄同生菜食，口感十分豐富。茶走 - 茶味濃，煉奶甜度剛剛好，唔會太甜。