時新快餐店 (Closed)

細細個住呢頭都成日喺度買漢堡包做早餐，味道當然唔記得晒，只係知成日去，嗰時佢都冇而家咁紅；分別經年，佢已經係開飯嘅超讚當紅食店，今日特登再一次重溫兒時曾經日日食嘅漢堡包。紅店果然多慕名而來嘅食客，我哋排咗一陣先可以入到去，叫完佢係即刻做嘅，所以先搵位坐低，聽號碼再攞嘢食。店入面冇乜點大整過，係佢啲膠袋印晒字，仲有啲員工有制服著咁囉，終於食得嘞，我哋叫咗： 雙層芝士蛋漢堡包：山長水遠嚟到，當然試佢最貴最多料嘅包款啦，佢嘅包有烘過，少少外脆內軟；牛肉有兩層，入面有啲洋蔥粒增加香味同食味，牛肉味唔係太濃但肉汁豐富；中間塊煎蛋啱啱煎到剩番個蛋黃有少少未熟，食落好嫩，仲可以濕吓塊牛肉，等佢再多啲汁；最底層嘅芝士因為熱到半融，亦加添美味，的確係比麥記出色好多！ 熱狗：普通咗啲，沙律汁唔夠杰身搞到個包好濕，腸仔亦係來貨，一般處理手法冇乜過人之處。 凍鴛鴦：夠香夠濃，面頭仲有啲似意式咖啡嘅泡沫，幾好飲！可能係期望過高，唔係覺得特別好味，因為好多快餐店啲漢堡包都差唔多係咁嘅味，可能咁啱紅磡呢個位得佢一間，所以先創造到佢嘅傳奇！