備長

Open Now

Now Closed

今日去咗銅鑼灣食串燒，揀咗呢間居酒屋，入到去揀咗坐吧枱，可以見到師傅即叫即燒。餐廳準備咗小小野菜同埋調味做前菜，俾食客清一清個口。去到叫咗唔少新嘗試嘅串燒，首先係自家製免治雞肉棒，配有蛋醬，點嚟食更香，免治製法嘅雞肉雞味濃之餘，咬落去質地稔身易咬。之後叫咗最近新寵白鱔串燒，鍾意佢香得嚟肉質結實，餐廳落咗黑椒同鹽調味，食落彈牙而且燒到脂肪啱啱溶，油脂感滿滿。荔枝豬肉卷，配搭幾新鮮，清新嘅荔枝肉令到豬肉冇咁油膩。主食叫咗墨汁炒烏冬，用烏冬煮真係比較少見，但係烏冬比意粉粗同吸水，所以好入味。而且加入咗墨魚鬚同豚肉（有驚喜因為本身黑得滯睇唔到），豚肉嘅調味鹹鹹地，同炒烏冬好夾好好味。炒雜菜分量算多，亦唔算好油，係健康之選。牛舌厚切，名副其實嘅厚切，好厚身好好肉地，食落彈牙而且有串燒嘅焦香味。串燒豆腐外皮炸過，好香脆，仲有醬油調味。最後叫咗串燒粟米，上面搽咗牛油，好香好甜，仲好 juicy好多粟米汁。嘢飲就叫咗烏龍茶 sake cocktail，茶味清清地可以消滯，同時又有sake，一次過滿足曬兩個願望。