龍泉冰廳

Open Now

Now Closed

銅鑼灣返工嘅打工仔！OT有福啦！作為打工仔一族，唔可以餐餐都食得咁豪，放lunch放工食餐飯，快靚正又好味，醫飽個肚仔就得。蘭芳道嘅龍泉冰廳，lunch time嘅時間成日都有條長龍，不過入座速度都快，係我私心必到嘅茶記之一。茶餐廳企理，坐又唔會太逼夾，旁邊有卡位，都幾啱遊客要求。選擇都幾多，常餐焗飯炒粉麵飯鐵板餐小菜下午茶，基本上茶餐廳會有嘅佢都有。今日夥計強烈推介，蜜椒薯角牛柳粒！作為薯仔控，已經流晒口水。$80已經包例湯 白飯 仲要有餐飲，加咗個菜心25元，其實兩個人都好夠食😂。例湯係粉葛湯，飲得出冇落味精，而且仲好甜。重點嘅薯仔牛柳粒，薯仔經過油炸，中間軟綿綿，再加少少蜜糖，超好食！牛柳粒份量好多，一個人嘅話真係食唔晒😂，好鬆軟多汁！奶茶紅豆冰，奶茶茶底好香濃，好有奶味，紅豆偏甜有咬口，加埋落奶茶度啱啱好。朋友仔想食常餐，大讚五香肉丁米，米粉好幼滑，而且好吸湯 ！另外仲有火腿奄列同多士。本身姐姐仲推介我哋試吓軟殼蟹菠蘿包🤣下次等到下午茶，要試！茶餐廳嚟講，銅鑼灣有唔少，不過價錢唔貴，而質素合理嘅話，其實都唔得幾多間，有興趣又想食平啲啲嘅話記得去試吓佢。