Hal's Japanese Restaurant (Moved) New Location

因為工作關係,要同同事們一齊留到夜晚十點幾,由於大家先知先覺,七點已經嗌定外賣。既然做得咁辛苦,唔好委屈自己,就食日本野!不過,原來HAL唔係樣樣野都有外賣,而且外賣同堂食係唔同餐牌,同事本來想要個海鮮什麼定食,但係無外賣,唯有叫另一樣。先講自己果個牛肉湯蕎麥麵,餐方好細心分開湯同麵上,估唔到,個麵好好味,有少少麥味,而且食既時候仲係暖,反而牛肉都幾多膏,令到個湯肥淋淋同頗油,不過牛既份量真係好多,食到飽得好緊要!至於個湯,同我想像中有出入,因為好濃,好有牛味。大家又share左個前菜,叫海鮮什麼春卷咁上下,以為係炸物,但係原來好清新,用既係好似紙米卷既皮,白色既,裡面有海鮮之餘,仲有好多菜,如青瓜絲咁,食落竟然係爽口架!係一道又健康又清新既菜色!一客都有五六件。個汁係酸酸甜甜既紅色汁,我都唔知係乜,味道普通啦!咁多個便當之中,其中一位同事既奄列蛋飯最香最正,本來見到個樣,同一般奄列蛋飯唔同,因為唔係用蛋包住飯,係蛋同飯分開左,蛋仲好似普通炒蛋添!以為佢唔好啦,點知原來好好味,牛肉係一舊舊咁,同牛肉湯蕎麥麵果d一塊塊唔同,亦好味好多!至於燒牛肉飯同炸豬扒飯果d,同事意見係麻麻,一般啦!