花月居酒屋

Open Now

Now Closed

朋友仔約食日本野，估唔到餐廳就在我公司附近。不過就算有地址都唔易搵，因為餐廳在中心的2樓，入口唔太明顯，要花點精神。去到令我哋有少少驚喜，呢間日本野原來係日式風味好重的居酒屋，入邊仲有好幾台日本人。我去到的時候，朋友已經點左大部份食物，我當然係乖乖地食啦。見到當晚牆上面有不少時令推介，都係比較特別的菜式。先上一個刺身拼盤，一份拼盤入邊有八款不同的刺身，好豐富。幾款刺身當中我比較欣賞帆立貝，味道甜得來好清新。反而拖羅雖然味道濃厚，但就有少少筋。同時亦有雪場蟹腳沙律，估唔到呢個沙律有咁多蟹肉。除咗沙律頂部的幾件蟹肉外，清新的青瓜絲沙律內亦都混入左唔少蟹肉同蟹子。朋友聲稱，串燒喺呢度的主打，所以佢哋點左幾款俾我哋試吓。銀杏唔係我杯茶。呢款雞肉串好特別，上面有一塊紫蘇葉包住，有一種特別的香味。牛柳粒勁Juicy。燒雞翼做得好出色，雞肉外皮脆得來肉質非常嫩滑。當晚我哋亦試咗天婦羅番薯，味道唔錯，可惜口感硬左少少。最後我哋都點左飽肚野，呢個韓式豚肉鍋真係好好食。湯底濃香，豚肉係腩位所以好滑，配料亦好豐富，有齊我最鍾意的金菇同韓式粉絲。