鮪世市場 (Closed)

呢日放假去咗將軍澳踩單車，咁事前就梗係要食個美味午餐啦。朋友話聽人講坑口有間隱世壽司店「鮪世市場 」好正，咁我哋就順便試下啦😜。朋友去攞位先，但諗都諗唔到Weekday竟然要等位之餘，仲足足要等半個鐘！其後我哋仲發現餐廳原來兩點鐘左右就會停止派籌，因為佢哋三點打後落場，晚市先再開返😮。不過都明白嘅，因為座位極之少，一眼望晒，大約得十個吧枱座位。之但係裝修真係幾靚，幾有日本風味🇯🇵，感覺乾淨衞生、無異味。完全唔似座落於街市旁嘅美食廣場。苦苦堅持，等到大約兩點半終於有位😆，女店員即刻為我哋送上熱茶🍵，過程中佢亦有不斷幫我哋加水。店員同壽司師傅們都好好禮貌。餐廳午市有賣丼飯定食🍱，價錢比較相宜，介乎$58-$98。另外，當然唔少得散叫嘅壽司同手卷啦🍣。我要咗丼飯餐，所以有埋胡麻田園沙律🥗以及海鮮味噌湯，好豐富。什錦魚生丼($58)，哇哇哇，我敢講呢個係我食過最好食嘅魚生飯😋，貴幾倍嗰啲都無咁好食。第一樣令我愛上嘅原因係壽司飯好高質，米飯溫度保持微暖，醋味恰到好處，不會過酸或過淡，而且質感濕得嚟唔會黐立立🍚。第二，什錦魚生平日比人嘅感覺係下欄嘢，但呢到不單止無呢個情況，反而我仲食到魚生嘅鮮味。