JA Kitchen

渡船街一帶真係一個寶藏，好多年前會特登過嚟食越南嘢同埋港式串燒，早排又特登過嚟買麵包，今次就特登過嚟食日本嘢，唔係位於主流餐廳區域，但係非常有驚喜，性價比好高。基本上嚟到都唔使點諗，大家都會點$580嘅套餐，前前後後有成9個courses。咁多個courses裏面，每一個都好滿意，我最鍾意真係個海鮮冷盤，佢用花雕浸嘅花螺已經好好食，仲要加埋嗰隻大頭蝦，我人生第一次食過最多蝦膏嘅蝦，仲要浸完酒好鮮味！秋刀魚都好新鮮！煙燻蟹肉釀雞翼都係非一般咁好食，用蘋果木燻出嚟嘅香口同普通燒雞翼絕對唔同。鰻魚木棉豆腐手卷係成個餐裏面最有驚喜嘅，估唔到個鰻魚啲皮可以分開燒，成件事好有層次。想講連佢個高菜白飯魚炒飯都好特色，啲白飯魚係香脆嘅加埋有味道嘅高菜，口感好好，好圓滿。全部嘅菜式都顯示到師傅嘅心機，每一款都係手工菜，店主店員都親切有善，根本就係食緊Fine Dining。呢度嘅環境同食物質數如果放喺銅鑼灣應該多收一倍價錢，呢一類型嘅小店真係要支持多啲。