東海薈 (北京道1號) (Closed)

好姊妹又要聚一聚，難得今晚咁齊人，小朋友同老公都一齊嚟，啱啱好夠坐一圍，朋友J就決定要食大家聚會咁耐都冇食過嘅中菜!呢間東海會喺尖沙咀北京道1號，初初諗住食中菜係冇咩特別嘅，不過上到去地方嘅幾寬敞，唔會好迫，仲有落地玻璃窗邊景，唔會好似平時啲酒樓坐得咁辛苦，非常舒服。除咗環境，食物亦令我喜出望外，我哋叫咗燒鵝王，放上枱傳來陣陣香味，燒鵝皮香肉汁多，圍枱轉左一圈已經食晒一碟，又係必試佳品！呢度嘅椒鹽鮑魚亦都非常惹味， 不過食海鮮我自己就鍾意清蒸多啲，保留原汁原味呀嘛！值得一讚嘅係佢唔只好食，賣相亦都好靚，淨係擺盆已經吸引到人！！咁大班人梗係要叫返個龍蝦伊面！龍蝦大大嚿好多肉， 老公最鍾意食!伊面唔會太淋，加埋啲汁味道剛好👍🏻👍🏻仲有一個砂鍋海鮮豆腐煲，有帶子，蝦等等，落足晒料！用砂鍋煮加埋啲配菜又香又惹味其他菜式好似京都骨，蟹肉扒菜苗，雜菌上湯浸菜等等都好味，不過就唔夠上面嘅出色啦⋯⋯估唔到呢度環境食物服務質素都有返咁上下，下次要試吓黎飲茶先得！