八幡屋涮涮鍋 (Closed)

同朋友去完鯉魚門買手信，出返港鐵站都已經傍晚，又開始肚餓，於是上大食代睇吓有咩好食，竟然見到有間火鍋放題，由於太耐冇食放題，我同朋友決定豪一豪佢先!!! 湯底要咗海膽龍蝦湯，海膽新鮮無腥味，澳洲和牛脂肪分佈平均，食落唔肥膩，龍蝦雖然唔係好大隻，但好新鮮同彈牙，最驚喜係湯底真係有海膽肉，不枉我哋加錢要呢個湯底。另外，我哋叫咗特選美國牛肉，呢款肉味較濃，雖然脂肪不及和牛多，但食落都唔嚡。火鍋配料除咗 order 嗰啲，例如牛肉、豬肉同海鮮等等，仲可以自己出去雪櫃拎啲蔬菜、丸類、山根、公仔麵等配料。壽司款式都多，而且又細細粒，食完唔會好飽，可以試多幾款，當中最鍾意火炙左口魚裙邊同海膽軍艦，左口魚滿口油香，魚肉又爽爽哋，好味! 海膽鮮美，仲可以無限添食，我 encore 咗幾 round! 回晒本啦! 燒物同揚物都有好多款，鹽燒多春魚燒得香脆，烤菠蘿我又食咗好多件，菠蘿唔單止多汁清甜，仲要有層焦糖脆脆喺面，食落更滋味! 飲品同甜品都係自助形式，店員有禮，食完嘢之後，好快就收捨好碗碟，就算我哋喪叫嘢食，都唔怕啲食物嚟到無位放，值得一讚。