Kim's Spoon (Closed)

嗱嗱嗱！我哋兩個出哂名鐘意打邊爐架啦，無論麻辣鍋、雞煲、日式和牛鍋……我哋一個星期至少都要打一次嘅！之但係，韓國嘅部隊鍋就真係好少食，因為M佬話嚟嚟去去都係得啲腸仔、火腿、餐肉、公仔麵，諗嚟諗去都係早餐一份，但就收我百幾二百蚊，所以每次經過，我都只可以喺門外面，偷偷昅吓啲大大隻嘅Oppa…吖，唔係，係偷偷聞吓啲部隊鍋！不過，有一日去開九龍灣拍拖行街街，路過呢間韓國餐廳 Kim’s Spoon，門口已經聞到好香，見到佢嗰豬腩肉配海鮮鍋又好似幾吸引喎，明明話唔鐘意Oppa嘅M佬就捉咗我入去試喇！一入到去，真係驚喜大發現！平時大家去開韓國餐廳，點都會有幾塊泡菜俾你做前菜，雖然部份餐廳可以畀你添加，但同我一樣咁鐘意食泡菜嘅你哋，一定會發覺，加得多都會唔好意思。點知呢度每一台都有成缸泡菜擺係度，味道又啱啱好，一定可以滿足各位泡菜！而今晚嘅主菜終於上台啦……嘩！真係好豐富呀！呢個鍋有平時部隊鍋嘅香味同湯底，真係可以用滿到瀉嚟形容，好多料。喺開始打邊爐之前，唔知大家會唔會試吓個湯底呢？我哋一定會喺開始前試吓，因為有好多餐廳會用水溝淡個湯底，借助你越打越濃，根本就唔會試出個原味。唔通打邊爐最緊要係個爐