肉料理 廣

Open Now

Now Closed

到名古屋旅行過後成日有一種空虛感，為左填補心靈同肉體既空虛，揾左肉料理 廣，一間專門食飛驒牛既燒肉店。肉料理 廣位處銅鑼灣中心地帶，鄰近地鐵站，相當方便。一進入店鋪，鋪面以紅棕黑三色為主調，光鮮之餘帶點穩重，坐下來店員就好細心欣勤咁介紹，我哋最後點了一個二人套餐精選A5飛驒牛十部位，外一碟厚切澳洲和牛牛舌。套餐包括三小碟前菜，麻油芽菜同菠菜入口鮮嫩爽口，泡菜蘿蔔亦爽脆惹味，之後既茶碗蒸蛋滑溜蛋香足，不過小心燙口。接著係赤身壽司同霜降和牛壽司，大廚燒到五成熟，入口牛味濃烈，尤其霜降和牛油份滿滿，香氣十足。之後厚切澳洲和牛牛舌，牛舌控必點，燒到外表焦香，入面嫩口，油份滲出來，配上自家制燒汁 同檸檬汁真係好食到不得了。主角A5飛驒牛和牛拼盤有八款不同部位既肉，五款赤身，包括亀之子，和尚頭，里脊肉，臀骨肉，上后腰脊肉，赤身肉口感有嚼口，肉味濃，食完唔會過膩，三款霜降，有西冷，友三角，肉眼扒芯，口感比較軟糯，油份高，放上火爐上火勢猛烈，所以燒起上來要小心留意，配上飯食更添風味。最後奉上石鍋鰻魚飯作為完美既結局，焦香既飯焦配上軟淋入味既鰻魚，加少少七味粉調味，香口惹味，食完剛好七份飽，滿足又舒服。