新和富餐廳菜館 (Closed)

琴日又去接女友放工，決定行遠少少去呢條北角嘅食街揾食...幾年前嚟過佢哋旁邊嘅姊妹店仁寶，印象唔錯，今次去正鋪食，斷估都唔會太差啩...忽然好想食蠔，就整個砵酒焗生蠔。加入大量葱段及洋葱，D葱索晒大部份嘅汁，比蠔更好食。砵酒味濃，蠔用美國桶蠔，大大隻，好夠味，誠屬不可多得之作...食得興起，再嚟過涼瓜炒蟶子皇。蟶子大大隻，難得煮得夠爽亦夠鮮甜，配合豆豉香及涼瓜嘅甘苦，吃得不亦樂乎...招牌菜籠仔荷葉蒸蝦飯反而有D失望。飯冇乜荷香，金蒜亦落得唔夠，不過份量夠多，蝦都算幾新鮮，補番數...埋尾嘅芋蓉西米露着實有驚喜---- 芋頭粒夠粉，充滿椰蓉香(過氣甜品專家認為係D椰蓉應該係佢哋自己磨嘅)，甜度剛好，食到唔停得口...可以列為"食得過單位"...