新大壽日本料理店 (Closed)

星期四去咗呢度食飯。食咗串燒包括牛舌、帶子'仲有一個唔記得，剌身有象拔蚌、唔記得咩魚同北海道海膽，之後因為唔夠飽，所以就叫多一個壽司拼盤。所有串燒都好香同惹味，而且都用料新鮮；而剌身亦都係，只係個象拔蚌因為話係日本嘅象拔蚌 ，所以份量少得可憐，只係得8、9粒左右，無錯係一粒粒嘅，並唔係一塊塊嘅!!!不過都OK好味。然而，剌身嘅價錢真係偏貴咗些少。最令我覺得喜出望外嘅係最後叫嘅壽司拼盤，有牡丹蝦、油甘魚、鱆紅魚、吞拿魚腩、帶子等等，同埋6粒用吞拿魚腩磨碎嘅壽司仔，我最想不到就喺呢6粒竟然咁好食，因為加咗芝麻粒，連埋啲吞拿魚腩，真係好好味同香口!!!最後，可能我同老婆食咗咁多嘢，所以就竟然有雪糕送喎；而且，仲有成$150蚊coupon送。總括嚟講，食物嘅質素係水準以上，而服務方面都OK嘅，因為有幾長嘅時間成間鋪都只係得我一枱客。所以，我都好有可能會再去嘅。