Ruby Tuesday (Closed)

做咗會員後間唔中都會去食，雖然未試勻每樣嘢，但食咗幾次都有啲心水推介。湯都幾大碗，不過味道一般。意粉/飯類可能見人見智，個人認為某連鎖 pizza 餐廳更勝一籌。Ruby Tuesday 以肉類取勝，每次叫都 keep 到水準。豬肋骨  - 我覺得呢個必食。話說第一次食叫咗個拼盤得半條，覺得唔多夠喉，所以自此叫 Full Rack。BBQ 醬恰到好處，啲肉用叉挑即離骨。一人食兩三條骨啱啱好，食太多會漏。西冷 - 作為牛魔王，我覺得 Ruby Tuesday 嘅牛扒真心，每次都煮得啱啱好，肉質有一定水準；唔似某啲餐廳有時會連住一大舊肥膏又多筋，而且火候控制時好時壞。羊架 - 羊都係我嘅飛佛，羊架要整得好食唔易。呢碟調味OK，肉仲係粉紅色但冇血水；有時啲餐廳會外圍熟透，中間仍有血水。所以整體嚟講唔錯，鍾意羊嘅不妨一試。