佳佳甜品 (Moved) New Location

佳佳甜品係我最喜歡嘅港式糖水店。由佢細細間舖開枱坐街，食到而加大大間舖。遲啲佢地搬，我一樣會繼續支持。喜歡佳佳有好多個原因：1) 味道。佢地做嘅每一款糖水都好出色。食咗咁多年，基本上款款都食過晒。我個人特別欣賞佢嘅薑汁糖水。薑味好濃，辣辣地又唔會太哽，甜味恰到好處。襯蕃薯同湯圓都真係完全無得輸。佢嘅湯圓又係極品。麵粉唔會太厚，而且好煙un，個芝麻餡真係好流沙，而且好多餡，唔係好似有d地方食咗大半粒湯圓先食到少少芝麻餡。同埋最值得讚嘅係佢嘅芝麻餡滑得嚟唔糊，食落去真係有芝麻嘅質感咖。2) 感覺。佳佳用嘅餐具－ 懷舊陶瓷碗－真係勾起好多兒時回憶。加上佢舖頭嘅木枱木椅，令我諗返起細個嘅時光。今日下晝2點零3點到嚟食，咁啱兩個搭枱嘅都係一個老人家帶住一個小學生，放學走去食糖水。呢啲溫情唔會係你喺香格里拉high tea搵到的。3) 人情味。佳佳就算做到出晒名，個價錢一樣都好親民。面對咁貴嘅租金，佢地都堅持18蚊一碗糖水。呢d就係人情味了。Overall, 佳佳喺我心目中係9.5/10。其中嗰0.5分係比某d態度帶點惡劣嘅伙記的。