Ufufu Cafe (Closed)

呢幢大廈夜晚成日勁排長龍，估唔到晏晝反而冇乜人喎，仲有得坐窗邊位添！我同朋友仔分別叫咗鐵板和牛漢堡扒 & 一口吉列豬扒咖喱蛋包飯，我就再 top up 飲品做抹茶忌廉拿鐵（話晒食日本嘢係要叫返杯抹茶飲品嘅）。如果你柯打咗鐵板餐，店員會好貼心咁比件圍裙你，咁就唔會整污糟件衫啦。果塊和牛漢堡扒大過我個拳頭囉，你話誇唔誇張，但係又唔會煮到乾爭爭。好味道嘅程度係，同事話佢會為咗呢塊和牛漢堡扒返黎食架！不過我哋有個小小建議，就係鐵板醬汁可以考慮另上，因為個碗放喺鐵板上變得好熱，攞上手真係非常容易辣親手，尤其是小朋友就會好危險啦！相比之下，原本都幾大塊嘅吉列豬扒都變得細咗啲。咖哩好有日式嘅味道，甜甜地亦唔會太濃味，上面滑蛋嘅質感亦做得啱啱好。而抹茶拿鐵嘅忌廉太多，飲到最尾變咗食忌廉。其實餐牌仲有介紹水蜜桃甜品，不過午飯時間太短，下次再嚟慢慢嘆個靚靚下午茶試下先！