小小串 (Closed)

上次試完個安格斯牛覺得好好食之後，心思思又想再食其他嘅串燒。佢哋有一樣好貼心嘅安排就係喺舖頭前面放咗一set檯櫈，令我呢d大食鬼又想即場食嘅人可以即時享受到串燒嘅鮮味，加分。呢兩次分別試咗佢哋嘅墨魚咀，鰻魚，雞腎，雞軟骨，台灣腸，安格斯牛同埋扇貝。安格斯牛質素同上次一樣，都係好好食。鰻魚調味較得好好，醬汁唔會太甜太咸，同埋咬落有少少脆口，應該係個火喉控制得好。雞腎一d都唔靭，有嚼勁，調味啱啱好。台灣腸唔錯，同岀面d正正常常嘅串燒店一樣。扇貝+蒜蓉一向都係唔會岀事嘅配搭，不過呢度嘅燒扇貝食得岀個味好鮮，加埋佢哋嘅辣粉會更加惹味。雞軟骨好酥脆，好鐘意佢哋嘅串燒會燒到有少少脆口。最驚喜嘅係墨魚咀。好大粒！好大粒！好大粒！(很重要所以要講三次)咬落去好juicy。絕對係呢度嘅must eat item.希望呢間有heart嘅小店可以多d人去，繼續喺西貢企硬守住啦。