Nathanhouse (Closed)

因為都食過幾次，每次食嘅菜式都唔同，相係分開幾次影嘅。 先講下呢度嘅牛扒，真係好好食，基本上每次都食，三成熟，唔會有血水流岀嚟，rest嘅時間足夠，又唔會乾。牛扒仲有炭火燒過嘅香氣，呢個價位嘅餐廳可以算得上超值。 蠔都係基本上每次食，岀色嘅係佢哋自己調配嘅汁，其中一個青瓜做嘅醬配搭生蠔非常精彩！！ Bouillabaisse 呢個真係比個大廚嚇親，我本身就係魚湯迷，呢個有魚大蝦紅蝦蟹青口蜆嘅湯，真係超級大滿足！！ 亦有細版龍蝦湯，寫食評嘅時候都流緊口水。。。 牛肉他他就食得多，蝦他他就第一次食，好香非常鮮甜，配搭沙律菜，口感豐富，如果唔係要留返比其他人食，呢碟我可以清咗佢！！ 椰香冬蔭功鑽石蜆 我係唔太鍾意食冬蔭功嘅，但係呢個湯椰汁味比較突出，冬蔭功只係襯托，非常惹味，蜆肉熟度完美，粒粒飽滿，鮮甜。 薰衣草奶凍配士多啤梨沙冰 甜品方面我就好隨便，有又得，冇又得。所以冇乜影過甜品。不過呢個真係唔係度度都食到嘅味道，特別之餘亦要稱讚大廚嘅心思。