龍鳳祥餃子館 (Under Renovation)

作為一個好鍾意食餃子嘅香港市民，香港有咁多間餃子店，都唔知試到何年何月先試得晒⋯今次嚟到佐敦，一於試一試呢間網上有唔少好評嘅餃子店先。因為去到嘅時間未到普通晚飯嘅時間，所以鋪頭入面冇乜客人。而因為冇乜客人嘅關係可能，個冷氣仲凍過雪櫃⋯不過只要有熱嘅嘢食，冷氣開幾大都唔再緊要！因為冷氣太凍嘅關係所以好快就決定到要食乜，一定係可以暖身嘅羊肉餃子～另外再叫咗牛展冷麵同埋酸辣湯！上菜嘅時間都相當有效率，不過如果鋪頭冇人都慢嘅話咁就真係唔係太正常嘅⋯佢呢間嘅豆瓣醬我幾鍾意，同埋個羊肉煎餃都真係相當之唔錯！本身以為其他菜式應該普普通通，但係佢個牛展拉麵嘅牛展我覺得做得相當之唔錯～好林同埋好入味。個酸辣湯都相當足料，入邊可以撈到好多豆腐同埋木耳。下次再同大家分享其他餃子店嘅食後心得。