Video
Read full review
2014-12-30
1297 views
睇過報章介紹，一心想試吓呢間隱藏於九龍城嘅小店。嚟到門口已經圖文並茂介紹拿手菜式，入到去擺明茶餐廳格局，一坐低已急不及待表明已訂位，侍應好醒目，即刻準備上我事先留咗嘅胡椒豬肚雞煲。胡椒豬肚雞煲$188👍👍侍應SET好卡式爐同上咗碟生菜豆腐金菇菜之後，就遞上個煲。師傅原來係將豬肚包住半隻雞，再縫合一齊嚟煲，煲足六七個鐘。侍應好細心，比我哋睇完再拎番去厨房剪開豬肚再上枱，我哋二話不說先飲啖湯，胡椒味十足，夠涫夠甜，豬肚入味，雞件腍身，食完成身暖晒😊金磚一口豆腐$38👍👍炸豆腐食得多，呢次真係一百分！最難係外脆內嫩，外皮有少鹹味同芝麻香，仲要係賣$38！！真係UNBELIEVABLE😍辣爆排骨仔$58👍做法似四川辣子雞。關鍵係排骨走油至乾身，再配大量辣椒乾炒，惹味香口，上枱時好似啫啫雞煲咁重熱到啫啫聲😳但可能要遷就香港人口味，嗜辣嘅我下次會叫師傅放心加辣，應該可以更出色。今次叫三樣嘢全部都水準以上，可惜礙於得兩丁友，啲餸又十分抵食大碟，所以未能多試其他菜式，希望下次多啲人嚟開餐可以試多幾樣。 以街坊價錢食到大㕑功夫，性價比極高。今晚全場爆滿，奉勸各位如想幫襯一定要訂位，而胡椒豬肚
睇過報章介紹，一心想試吓呢間隱藏於九龍城嘅小店。嚟到門口已經圖文並茂介紹拿手菜式，入到去擺明茶餐廳格局，一坐低已急不及待表明已訂位，侍應好醒目，即刻準備上我事先留咗嘅胡椒豬肚雞煲。
胡椒豬肚雞煲$188👍👍
侍應SET好卡式爐同上咗碟生菜豆腐金菇菜之後，就遞上個煲。師傅原來係將豬肚包住半隻雞，再縫合一齊嚟煲，煲足六七個鐘。侍應好細心，比我哋睇完再拎番去厨房剪開豬肚再上枱，我哋二話不說先飲啖湯，胡椒味十足，夠涫夠甜，豬肚入味，雞件腍身，食完成身暖晒😊
金磚一口豆腐$38👍👍
炸豆腐食得多，呢次真係一百分！最難係外脆內嫩，外皮有少鹹味同芝麻香，仲要係賣$38！！真係UNBELIEVABLE😍
辣爆排骨仔$58👍
做法似四川辣子雞。關鍵係排骨走油至乾身，再配大量辣椒乾炒，惹味香口，上枱時好似啫啫雞煲咁重熱到啫啫聲😳但可能要遷就香港人口味，嗜辣嘅我下次會叫師傅放心加辣，應該可以更出色。
今次叫三樣嘢全部都水準以上，可惜礙於得兩丁友，啲餸又十分抵食大碟，所以未能多試其他菜式，希望下次多啲人嚟開餐可以試多幾樣。
以街坊價錢食到大㕑功夫，性價比極高。今晚全場爆滿，奉勸各位如想幫襯一定要訂位，而胡椒豬肚雞煲必須要預先訂先有得食。
Other Info. :
侍應態度殷勤有禮，全晚笑容滿面，非常難得！👏✨
(The above review is the personal opinion of a user which does not represent OpenRice's point of view.)
Post
