鍋心粥底火鍋 (和富道) (Closed)

2020新年，一家人選擇去打邊爐慶祝。早場5.45開始，門口人頭湧湧排晒大隊，好在親戚一早幫我地訂咗位，如果唔係實無位。每位$200包括頭盤海鮮+5款自選海鮮+8款食品，開頭都擔心唔夠食，但我親戚話次次都食唔晒，因為份量都幾多下，最後真係差少少食唔晒。頭盤蟹質素普通，但用來煮粥湯底還可以。沙白唔知乜嘢品種，明明一般3至5分鐘就會開口（熟），但有一半都住左10幾分鐘先至熟，好在味道還算鮮甜。龍蝦就有驚喜，雖然唔算大隻但好多肥膏，蝦肉鮮甜結實，早知全部叫龍蝦唔要蟹。鮑魚新鮮又大隻，滾完後仍然好嫩滑。生蝦就爭小小，親戚話平時所有蝦都好生猛會跳跳紮，但今日有一半都好似差少少。另一個有驚喜係多寶魚，本身我都好鍾意食多寶魚因為貪佢夠滑，估唔到滾完後後更加滑。西班牙豬梅頭片有啲失望，又鞋又韌。花膠仔亦係驚喜之一，雖然唔會係好高質素嘅花膠，但分量超多好抵食。肥牛亦有水準，唔會太肥，好淋好有牛味。其他食材（魚皮餃、金菇、花枝丸等）水準都合格。食完清晒所有食材後，侍應就會攞預備好嘅粥加入之前我們的湯底，海鮮味濃厚又滑嘅粥。