孖寶車仔麵

Open Now

Now Closed

香港其中一個令人著迷嘅地方固然就係香港嘅美食與及食物價錢嘅彈性。 六千蚊可以食一餐， 60蚊亦都可以食到一餐非常滿足好味嘅，豐儉由人 。 疫情關係，收入大減價，所以而家出街食飯都會偏向價錢親民一啲嘅小店 。今日就去咗葵芳廣場地下“孖寶車仔麵“食香港地道美食-車仔麵。 兩個人分別嗌咗一碗招牌麵$46， 一碗牛腩麵$36。 另加一份鹵水雞翼尖$12同埋牛雜$20。招牌車仔麵固然大堆頭， 有齊曬雞翼，蘿蔔，豬腸，豬紅等等精選美食，46蚊大大碗性價比十足。 我就食咗牛腩麵，睇圖都見到牛腩覆蓋咗半個碗。入口完全冇牛嘅騷味，而且煮得好林， 好有咬口但肉唔“鞋“，仲有浸浸嘅牛肉香味。 湯底係飲到有味精嘅 ，但係這就是車仔麵嘅神髓囉 。 鹵水雞翼尖冇得輸 。12蚊12隻， 非常抵食 。最適合鍾意“ 算“骨嘅我。 最後一樣牛雜， 如果你去其他旺角嘅街舖，20蚊一杯仔仲要用蘿蔔墊底，數埋先得幾舊牛雜。 但係呢一碟就非常足料，有齊豬腸牛蒡牛肚等等十分滿足 。 順帶一提， 其實除咗車仔麵之外，仲有其他類型嘅食物例如飯同埋腸粉燒賣都有。，選擇都算廣泛 。總括嚟講咁樣食法埋單都係每人60蚊，夫復何求呢。