篤篤車 (Closed)

車仔麵係我既最愛之一，知道旺角有一間泰國風味既港式車仔麵 即刻去食。呢間車仔麵嘅粉麵配料都算幾多 有好多出面都冇嘅選擇 有啲小海鮮 都有其他一般常見既料。我哋兩個人試咗兩款唔同嘅湯底，我鍾意食辣，就叫咗咖喱湯小辣 叫咗貢丸芝士腸同埋山根，套餐選擇左腐乳生菜，加泰式炸雞翼 $81 咖喱湯底好似有少少藥材味，味道香濃 小辣已經食到辣味🌶️🌶️ 泰式炸雞翼好脆皮 香口，配個菜 又唔會好油膩。另外一個就要咗清湯加腩汁，配珍珠元貝、墨魚仔同埋豬大腸 $44+12 海鮮好多料，3個餸滿滿一碗👍🏻👍🏻 清湯配腩汁，腩汁味突出 有五香味，清得黎又唔錯！小食，仲另外加咗個泰式鳳爪，冇骨既 食落好方便酸酸甜甜又開胃。車仔麵有套餐選擇都幾抵，又有其他湯飯 泰式飯餐等等 可以一試架👍🏻👍🏻