京香閣 (Closed)

朋友最近返新工，佢話之前同同事試過位於無限廣場嘅呢一間京香閣，個水準都唔錯。一於拉埋我哋一齊去食呢個咁抵嘅京菜放題，最緊要嘅係有片皮鴨任食，對於鍾意食中菜嘅人嚟講，絕對係非常開心。片皮鴨任食當然係重點，但都可以選擇龍蝦套餐，或者虎蝦套餐，我哋就選擇咗龍蝦餐， 聽店員講講，蒜蓉或者乾燒都好惹味，所以就試試蒜蓉味啦。果然唔錯，龍蝦夠曬大隻，而且好彈牙，加埋蒜蓉夠曬香，非常好食。至於燉湯都好足料，有蟲草花同花膠，加上雞湯味道濃郁，飲落好滋潤。重頭戲當然係片皮鴨啦，師傅現切片皮鴨，夠曬新鮮，切得厚薄適中。亦有新鮮蒸嘅北京麼麼，即係平時包片皮鴨嗰層皮。爆汁嘅鴨皮埋青瓜同京蔥一齊食，好食到停唔到口，忍唔住食多兩件。亦都有好多款京式小菜、涼菜、湯、粉麵任食，味道都唔錯。特別推薦呢個醉蝦，酒味香濃，不過唔會太重味，但就算唔飲酒嘅人都啱食。而且啲蝦肉質好彈牙爽口，蝦肉好鮮甜，必試。仲有好多款即叫即蒸嘅點心同甜品，尤其小籠包最多人嗌，夠曬皮薄多汁，每人食返一籠是常識吧。最後食埋個高力豆沙作結，豆沙甜而不膩，令人食得滿足。