金泰美食 (Closed)

九龍城一向出名多泰國餐廳，好多都打著正宗既旗號，真係花多眼亂好難擇。好彩今晚個飯局有位友係金泰常客，於是就發現左呢間正宗又特別泰國菜。五個人叫左六碟野食，碟碟都夠哂大碟，泰國菜黎講真係算好抵食！呢碟酸辣柚子大蝦一上黎個陣都有D驚，會唔會好怪架？好在個酸辣汁夠哂味，完全冇沖突既感覺，每隻蝦都好大隻，抵食之選！之後就係個個都大讚既串燒，可能因為期望過大，除左雞串夠哂滑之外，其他都不過不失；值得一提既係，個沙嗲汁好明顯係自家製，十分正宗，出面未食過既味道，為串燒加分不少。呢碟豬頸肉係朋友大力推薦，果然冇介紹錯。同坊間一般既豬頸肉唔同，半肥瘦之餘十分爽口，個醬汁聽講係正宗泰國南部醬汁，十分惹味。明爐烤魚就食得多，明爐魷魚真係第一次，蒜頭同辣椒既配搭一直都天衣無縫，魷魚又新鮮，讚！總結黎講都係好滿意既一餐~