東記雞煲烤魚火鍋點心餃子 (Closed)

琴日約左人去上水食烤魚，原先諗住食巴辣仔不過要等，咁朋友話食過東記覺得唔錯，咪排埋囉，入到去烤魚有3種，分別係鯇魚 、魽魚同沙巴班，咁我問左佢個沙巴班有幾大條，條友話斤零兩斤288蚊，咁我地4個人斤零重應該唔夠食咪叫個大份鯇魚食囉，點知黎到條魚我真係嚇一跳，以為上錯左菜，我又去問左夥計，佢話無上錯啊，細份1斤$168大份就1斤半$238，條烤魚真係細到又驚又慌，食多次烤魚未試過條魚咁細條基本上魚肉得1斤魚頭半斤，大佬鯇魚咁平既魚洗唔洗咁啊，搵笨既，個菜牌明明係成條魚咁show出黎，直頭違反埋商品說明條例添啊😳我地4個人都好無奈同o嘴，問返個fd原來佢上次黎食雞煲，唔係食烤魚，不過除左條魚，其他野都正正常常，d肥牛都幾好食，各位師兄師姐如果要點烤魚絕對唔好點鯇魚啦😂