華小料理屋 (Closed)

人氣壽喜燒餐廳😃主打日本和牛，餐廳座位非常之闊落，而且仲有間獨立房可以俾人包場，入面感覺非常之和風。二人餐比較抵 $1348，一於試吓先。二人餐有齊前菜、串燒、壽喜燒、野菜拼盤同甜品。冷盤前菜三點三文魚刺身中規中矩😃都屬於新鮮嘅，汁煮蠔幾大隻，蠔味濃郁。鴨胸肉味比較濃，幾有咬口。串燒拼盤整體感覺都幾正，有齊雞翼、免治雞肉、冬菇、五花腩。最好食係免治雞肉，因為入面有啲軟骨食落去有咬口，配上甜甜地嘅醬汁，好好食。火炙和牛 切到成座山，咁樣已經好靚乙和牛本身已經好吸引，經過輕輕火炙，味道更加出，配上酸汁輕輕中和返。終於到咗，最吸引嘅壽喜燒☺️職員會問大家想食重口味定淡口味，太耐冇食壽喜燒，我哋揀咗重口味。因為每落一次牛，就會加一次醬汁，所以味道可能會好濃。套餐包咗佐賀A5和牛，分別係牛青椒（牛肩)＋大三角。牛青椒大約係手爭位置，細細片肉味重。職員會同時煮洋蔥、京蔥，中和和牛油份。大三角相對大片，油脂紋理更鮮明，超香牛味，配上皇帝菜食。由於已加了好幾次醬汁，所以比較甜，可以蘸上蛋漿平衡味道。最後剩低烏冬、雜菜，大滿足。甜品牛乳布丁，奶味重但唔太甜，好好食。