悠蔬食 (渣甸中心) (Closed)

之前有人介紹呢間素食餐廳話質素好好，今日路經銅鑼灣就順便試吓，喜歡佢藍白色嘅裝修令人感覺好舒服，感覺西式化，唔似傳統素食餐廳。餐牌上嘅款式都有好多，同朋友各自叫咗一個set lunch，有前菜、湯、煮食同飲品，都只係$98 ，相當抵。要咗個「姫松茸佛手瓜蓮藕雪耳湯」，估唔到咁多料，而且仲好熱，所以好好味。前菜係「松露清新鮮蔬藜麥沙律」，好多椰菜絲、豆乾絲、黑橄欖片、藜麥等，食落似菜絲沙律味道。主菜我叫咗「田園南瓜野菌忌廉燴扁意粉伴麵線蝦卷」，真係色香味俱全，一上枱已經聞到好香嘅芝士味，有好多配料：蘑菇、冬菇、青瓜、黃瓜、車厘茄、菜，貶意粉夠彈牙，非常好味。同行朋友叫嘅「大啡菇椰菜炒烏冬半香菜腐皮卷」，都十分唔錯，開頭以為大啡菇係原隻上，但原來佢切開用來炒烏冬，味道香濃。餐飲我加$10要意大利泡沫咖啡，都好飲呀！我哋仲加$25要咗個鮮果脆脆芭菲，睇幅相已經覺得好靚，上枱更加不得了，莫講話小朋友見到開心，即使係大人見到都心花怒放。最頂果層用cream整咗個好似玫瑰花嘅樣，跟住有曲奇雪糕、士多啤梨、Oreo，下面一層層鋪好有朱古力碎、蜜瓜、哈密瓜、cream、最底好似係奇亞籽，真係靚到唔捨得