武士拉麵 (Closed)

早排有朋友去咗尖沙咀見客，咁就順便約岀嚟食晏。我哋兩個都鍾意食拉麵，所以就決定帶佢去試一試武士拉麵。武士拉麵間店鋪唔大，大約得十個坐位左右，不過就有種去咗日本嗰啲小店嘅感覺，好適合一個人自己享受或者兩個人一齊傾吓偈食飯。餐牌有五款麵可以選擇，另外仲有炸雞、章魚燒同餃子等等嘅小食。我嗌咗碗「豐臣將軍拉麵」，即係四國香蔥油湯底拉麵，入口濃郁嘅蔥油香，配料有兩大塊叉燒、紙菜同埋半隻糖心蛋，鍾意蔥嘅朋友一定啱。小食方面我哋嗌咗碟餃子，老闆見我哋兩個人就話送多隻餃子比我哋，一人三隻，餃子煎得啱啱好，唔會好乾身，點埋酸酸哋嘅醬汁幾好食。老闆非常熱情，會同食客吹水，仲同我哋講咗佢以前喺岀面做廚房嘅事跡。如果你有興趣嚟試武士拉麵我建議你趁早去試，老闆有提及之前開嘅兩間分店都因為肺炎嘅關係結業，得返尖沙咀一間繼續營業，老闆話都唔知會做到幾時，可能做多大半年就唔做。咁有人情味嘅小店真係越來越難揾到，希望武士拉麵可以捱過疫情，等多啲人可以接觸到呢間隱世拉麵店。