野郎 Stone x 鰻工房 (Closed)

喺銅鑼灣附近行街見到有banner指向內街有呢間有賣石燒牛扒同鰻魚飯嘅日本餐廳就想試吓。店舖嘅位置比較入所以平時冇咩為意，不過入邊裝修唔錯環境都幾靚。今次食午餐我選擇咗食鰻魚飯加少少錢轉定食（加左湯、醃蘿蔔、溫泉蛋）。鰻魚飯個賣相好靚，佢飯有豆粒、紫菜絲同蛋絲喺度，配埋隻溫泉蛋撈埋啲蛋汁真係好好食好香蛋味。佢啲鰻魚燒得好脆真係外脆內軟，每啖食落口都好餸飯。不過個飯嘅份量唔大，女仔食就夠嘅，運動量大嘅男仔就未必夠啦。餐廳lunch我見有推出其他好似Pepper Lunch咁嘅鐵板炒飯，價錢都平民，啱晒想食lunch又唔想太貴嘅時候選擇。有機會下次想試吓石燒牛扒。