Deer Kitchen (The Wave) (Closed)

位於The Wave 6樓嘅Deer Kitchen, 故名思義就係以鹿為裝修及擺設嘅餐廳，燈光比一般餐廳暗些少，但配合埋裝修環境及座位又出奇地舒適而且有情調。主廚特色拼盤包括咗雞鎚、芝士條、魷魚圈、炸魚、黑松露蝦春卷，雖然全部都係油炸食物，但食落一啲都唔油膩亦脆口，熱度亦啱啱好，感覺唔會覺得好熱氣，真心推介。鮮海膽蟹肉明太子意大利飯混合明太子及蟹肉嘅意大利飯好creamy又有口感，配上鮮味嘅海膽，感覺良好。烤西班牙黑毛豬鞍伴香濃燒汁豬鞍烤得剛剛好，沒有肥膩感肉質鮮嫩，配以甜甜嘅紫薯蓉，令味道更有層次，真係回味無窮。整體非常滿意，至於服務方面，由於晚市近乎滿座，落單、上菜速度比較慢些少而且有些微亂，所以服務上稍為需要改善，但當晚只有2位服務員嘅關係呢點亦可理解，佢地亦非常禮貌交代過，所以影響其實不大。如餐廳考慮增聘人手解決問題那就再大大加分。