2+2 Café (Closed)

一家人慶祝母親節 嚟咗呢間食晚市自助餐，分兩個時間，頭段5:30 ，尾段8:00開始。我哋食尾段，成人606，有85折，未加一，價錢都合理。消費夠1000就有二小時免費泊車。上次來食都7年以上，呢到應該裝修過，食物款式好似少咗好多，可能係分開咗甜品區係門口個邊嘅原故啦。凍海鮮有龍蝦，蝦，生蠔，螺，青口。同近期食嘅自助餐一樣，冇一樣新鮮，全部都冇乜味，蠔我冇食，不過家人話好細隻。魚生都係大路款，唔吸引所以冇拎，家人話三文魚好一般，目測三文魚都係冇乜光澤。沙律有好多款，真係幾好味，有泰式同西式，全部水準以上。熱食有6-7款，見有魔鬼魚，以為好正，點知勁難食，嗰汁用甜酸醬，好奇怪，條魚好韌，肉好難離骨，冇任何魚味🙄。炸三文魚鰭，又係另一個伏，炸到硬過豬仔包。豬手就唔錯，中式熱食真係差。豬腳姜，人參雞湯味道ok。龍蝦湯夠濃味，小朋友喜歡。有切牛肉，一口牛，水準都係一般。咖喱做得唔錯，但係只有咖喱雜菜和咖喱雞，款式小。自選麵食區，唔吸引冇食。甜品區有雪糕同切件蛋糕，真係冇乜係吸引，小朋友都冇乜拎⋯唔怪得母親節都唔太full…。到你進步咗，我哋會再嚟嘅🤣。