Tea & Herb (Closed)

今天絕對係行程緊密嘅一天，上午陪朋友到跑馬地睇樓，接著到九龍培正一帶與朋友家人一起午膳，再到廟街玉石市場陪朋友買玉器。為咗應付咁緊密嘅行程，一個比較豐富嘅早餐係十分重要的。朋友提議到蜆殼街嘅一間小舖頭一齊食早餐，筆者當然無任歡迎啦。原來此店是openrice本年候選最佳西餐廳之一，見店內裝飾雅致，一派優閑之風格，顧客都悠然自得翻閱餐廳所提供嘅報紙雜誌。雖然行程緊湊，筆者都不得不稍微放慢步伐。望一望餐牌，有數款早餐供選擇，筆者叫了最喜歡嘅egg benedict，太座則點了炒雜菇及煙肉。Egg benedict嘅poached egg 烚得剛好，蛋白剛好變成固體，仍十分滑，蛋黃仍能保持液態，用嚟蘸麵包，十分可口。Hollandaise sauce 牛油味重但檸檬酸味唔明顯，係筆者的那杯茶，如果廚師可以慷慨一些，落多少少sauce，更合筆者心意。太座嘅早餐，簡單的雜菇帶點牛油香味，煙肉煎得有少少脆，炮製得對辦。享受完整份早餐，再來一杯香濃嘅熱咖啡，十分滿足。這裡嘅mocha朱古力味偏濃，咖啡味顯得偏淡，係可以改善嘅地方。每人平均消費八十多元，價錢亦屬合理範圍。