新台場台灣小食 (Closed)

好似之前通街都係紫薯咁，仙草、芋圓最近當紅，甜品店又好，小食店都好，都要袋番幾粒芋圓喺身。喺網上見過好多關於呢間小店嘅介紹，原來喺廣華街之前賣咖啡包嘅位置，食店轉得真快。基本上同以前裝潢一樣，冇大改動，一樣都係「外賣」形式。除左有芋圓，仲有幾款台式小食，例如芋頭酥、胡椒餅、鹽水雞、大腸包小腸等，價錢都唔貴。上次收工過到黎，9點幾鐘已經賣哂芋圓，今日專登早少少過黎，小食就留待下次有機會再食。綜合芋圓可以選配仙草底或剉冰底，單售$28，配黑糖仙草奶套餐價$45，平5蚊。綜合芋圓仙草底 $28大部分人都話佢又平又抵食，材料有仙草、紅豆、芋圓、綠茶凍、芋頭，外賣魚蛋兜嘅size，定價合理。佢地嘅芋圓係大大粒，裡面有餡，各自味道較淡，最重要係芋圓食落偏硬茶凍做得最好，滑留有茶味，芋頭夠粉，紅豆都唔算太甜。至於仙草則普普通通，稍為膠左少少，微甜，但30蚊唔洗都係合格。講抵食又好食，梗係太安樓來來啦。食店轉得快，除左靠一開頭嘅宣傳，要長久經營都要有實力。喂，隔幾個鋪位又有間新野(?)