阿茶茶。館 (Closed)

呢間Achacha Cafe & Bistro晌車路盡頭同泊車位嘅旁邊，車輛出入都幾繁忙。不過入到去之後，又係另一番景象。落玻璃窗透入唔少光線，牆上仲畫咗唔同嘅圖畫。有聞佢哋以法式薄煎餅馳名，而且仲有鹹甜之分。我就晌數款tea set之中試咗雜莓甜奶法式煎薄餅，薄餅面積好大，外型就似一把中式紙扇咁。邊位煎得非常薄脆，被餡料沾濕嘅部份就比較煙韌。除咗鋪面之外，中間亦夾咗唔少士多啤梨果肉，另外仲有鮮忌廉同質感好似煉奶嘅甜奶一齊食，味道酸香醒胃冇負擔。榛子鮮奶咖啡有淡淡嘅榛子甜香，咖啡味就甘香平衡。