DKLM Bar & Restaurant (Closed)

呢排成個社會氣氛太壓抑，所以放工約frd去bar傾計鬆一鬆。呢間DK Bar上次都去過覺得唔錯，今次就再去一次。佢既環境同樣係玩味十足，有唔少桌面遊戲比客人去消閑聯誼，好似桌球同ping pong game，而且有好多大電視，如果飲住啤酒睇波都幾正。今晚我地無叫酒飲，反而叫左兩杯Mocktail，我地同樣叫左Mango paradise，即係類近芒果沙冰，酸酸甜甜都幾開胃，而且happy hour 接近半價，好抵飲。小食方面，我地叫左兩款雞翼，分別係水牛城辣雞翼同蜜糖雞翼。水牛城雞翼炸得好香脆，熱辣辣加埋芝士，送飲品一流，而蜜糖雞翼都相當唔錯，蜜味十足，比平時既燒烤蜜糖雞翼，多d肉汁。至於主食，我同frd 2個女仔唔想叫太多，只係叫左一個日式帶子櫻花蝦意粉，份量都唔少，相較傳統意粉，佢係乾身而且意粉有咬口，有櫻花蝦提味，更加有層次。埋單每人150蚊左右。