Oliver's Super Sandwiches (Closed)

話說之前屯市嗰間裝修（今日已經開番），我就冇得喺呢間飯堂食，今晚難得可以喺元朗附近食飯，就去咗形點呢間超級三文治食。焗薯冇咗一排，依家有番，梗係要食一食佢。佢個焗薯鍾意嘅話可以連皮食，塊皮唔會話口感好怪，反而焗薯皮加埋啲焗薯再加上面嘅料係絕配，我個人最鍾意係煙三文魚沙律，但好可惜好多年前唔知幾時開始就冇咗雙球，依家一定要配一個蛋沙律球，如果我一定只會揀煙三文魚沙律，因為我食過晒咁多款，同焗薯隻味最夾嘅就係佢。識叫梗係叫套餐，會有個迷你凱撒沙律同一杯飲品。沙律有啲沙律菜、凱撒沙律汁、煙肉碎同埋芝士；飲品我通常都係飲白湯，今晚白湯係最好飲嘅忌廉磨菇湯，有好多磨菇，口感夠濃，係嫌唔係幾夠熱。10月會員優惠送一份芝士肉醬薯條，好味！稍嫌美中不足嘅係叫完焗薯又送多份薯條，一個人就會覺得太薯仔啦。