大家樂 (Closed)

聽同事講話大家樂嘅 POP POP五層脆腩幾對辦，但我一向對呢啲連鎖快餐店嘅燒肉無乜信心，食燒味飯都只會到燒臘飯店購買，不過既然有人做過白老鼠，就即管今日去買嚟試吓。買咗份五層脆燒腩多寶飯包括有脆腩、燒雞翼、紅腸、鹹蛋半隻 ($29). 聽聞話呢啲五層脆腩製作過程絕不馬夫，嚴選肥瘦相間的五花腩，以淮鹽、五香粉、玫瑰露等醃製。 咬落去的確非常鬆化，面嗰層皮夠香脆，跟住嘅脂肪層好甘香，接著的是一層薄薄的嫩肉，再落嚟係軟骨層及最後嘅全瘦肉，確係鹹淡適中，唯一係脆腩細舊咗啲，不過有蜜味嘅燒雞翼、紅腸等一齊食，都算豐富，如果有淨脆腩飯出售就更好了。而家購買仲會奉送一款涼伴小碟，我就選了爽口的千層峰。除咗呢款小食，應該仲有麻醬雞絲、五香牛、佛山燻蹄、七味照燒魷魚咀、涼拌貢菜、香茜茄子等輪流供應，中午想不到吃甚麼時，這個也是不錯的選擇。