119韓國站 (Closed)

見到間餐廳係Facebook做promotion, 身份證有相關數目字就可以有免費芝士排骨雞，所以就去試下，我地六點就開始排隊等位，坐低左之後就order嘢食啦。我哋order左一份雞湯同埋嘢飲，先講下個芝士排骨雞，排骨係一大舊，冇切開嘅嘅，雞就超級'鞋'，之後就到個雞湯啦，我哋order左一隻雞嘅份量，其實隻雞係細隻既雞，皮好厚，個湯底好咸，整體感覺唔似韓式雞湯。間餐廳最大問題除咗嘢食味道之外，重點係員工嘅態度，例如唔小心跌咗對筷子，咁我就舉手示意職員拎對新筷子，雖然有拎但表情態度差！坦白講，你估我想跌既咩，食野食到要受你氣。之後個雞湯滾起啦，職員過嚟剪開隻雞，因為個碗入面有排骨同雞骨，就同行過既職員講換兩隻新碗畀我地，點知個剪緊雞嘅職員超級大聲兼冇禮貌，話啲同事都好忙，你等一陣好唔好？連坐隔離幾張枱既客都呆哂。咁既服務態度同食物質素，貴兼扮韓國菜，我就一定唔會食第二次啦。