Twinkle Baker Decor (希慎道)

Open Now

Now Closed

歐爸雙子牛一，J神哥哥好有心思地喺「Twinkle Baker Decor」買咗個靚靚蛋糕俾壽星仔吹吹同許願。蛋糕盒個透明窗露出粉美嘅「冰雪奇緣」雪景，相信係為驗收蛋糕時唔洗打開盒蓋而設計，衛生非常。必需三日前預訂嘅「白雪奇遇」外型精緻動人，同XO仔喺便利店抽到嘅雙星仙子「Little Twin Stars」開運小瓷罌襯到絕！嘻嘻，連歐爸們見到都忍唔住要影多兩幅相放上社交網度曬。蛋糕除咗外觀吸引，原來仲內有乾坤，糕心藏有白色同粉藍色嘅朱古力豆豆，可增添玩意及口感，夠哂新奇有趣，未食已可提升場內氣氛！白雪奇遇（$388）：一早就預咗最外層嘅雪景糖霜會好甜，好彩個朱古力味蛋糕只屬微甜，又夠鬆，唯一質感偏咗少少乾，夾入咗朱古力味忌廉令蛋糕柔滑返，啲朱古力豆豆又夠甜脆，組合其實真係食得過嘅。「Twinkle Baker Decor」出品嘅蛋糕顏值高，包裝衛生，或許價格略為偏高，但於慶祝活動絕對可成功牽起高潮，大家不妨一試。