Odelice! (蘭杜街)

啊姨好欣賞Odelice!嘅食物，周不時都推介我去試下佢地嘅crepes。今日終於同朋友黎左食午餐。原來呢度12點前落單有八五折，早知早啲黎！午市套餐價錢由$58至$158不等，包左前菜同埋主菜，加$10或者$30仲有埋餐飲或者飲品添。主食選擇多，想食得輕盈或者豐富都得。前菜可以揀沙律或者湯。是日餐湯係蘑菇粟米湯。香甜嘅粟米粒同蘑菇碎增加口感，雖然簡簡單單，但係味道唔錯！田園沙律好大兜，酸酸媚媚好開胃。主菜方面，我地揀左法式慢煮豬肉面頰同埋澳洲肉眼扒配香脆薯條。經理話俾我地知豬面頰係今日先新增嘅菜式，估唔到味道唔錯，好入味，如果肉質再軟一啲就更好。薯蓉牛油味香濃，軟滑得黎又混有粒粒薯仔，口感佳！肉眼扒肉味濃郁帶脂肪香。伴碟嘅薯條唔會太油。飲品揀左椰青芒果熱情果沙冰同埋士多啤梨羅勒冰茶！終於到最期待嘅crepe，啊姨果然無介紹錯！自家製嘅朱古力醬朱古力味香濃。但更得我歡心嘅係基本款「牛油砂糖配檸檬汁」，簡簡簡單單，無濃味嘅醬汁或者配料反而可以細心欣賞口感煙韌、厚薄適中嘅餅皮。