為食貓特登嚟呢間Cat Cave Café除咗想探吓班貓星朋友之外，仲真係想試吓呢度嘅出品：我估應該唔會淨係得貓糧啩？
食物選擇不少
除咗貓星人之外，呢度食物選擇都唔少，比起好多Café多好多選擇，有啲仲係其他Café唔易搵到。為食貓點咗一份藜麥海鮮意粉（$78），用最Basic的圓身意粉，混入藜麥（亦即係Quinoa）。配料有兩隻細蟹拑、青口、蜆，加上有蟹肉絲混咗入去意粉度，份量唔細，都夠飽。不過呢，藜麥就混得唔係咁均勻，有啲位就食唔到藜麥；同埋上枱嗰陣意粉底有唔少水份，所以都想提提店家記得滴乾意粉再煮。味道就中規中距，未有好標青，但就幾有特色。
另外小Café出現酥皮海鮮湯（$38）都算幾搶眼，為食貓當然都唔執輸。酥皮就唔算焗得酥脆，無嗰種一刀落去就火花四散嘅效果；亦由於呢個原因，塊酥皮似麵包多於酥皮。不過個湯都算咁上下，質地算濃而且味道都夠，如果落少啲鹽就仲好。
小食不錯
呢度有幾款小食，當中某啲算比較難喺Café搵到，例如芝士流心小丸子（$38六粒）同煙肉芝士焗薯皮（$36四件）。前者圓碌碌賣相幾靚，好似粒炸過嘅湯圓咁，仲有紫色同黃色兩種。咬落都算煙韌，入面就真係包住流質芝士。可能因為為食貓要相機食先，所以凍咗少少，無咗「缺湜」嘅效果。芝士味都算香，值得試。
煙肉芝士焗薯皮外表有啲混亂，沙律醬落太多，令賣相有啲扣分。薯皮焗得差唔多，唔怕太乾，有薯肉有薯味，合格㗎。煙肉就切粒整脆，咬落口同薯肉嘅軟淋淋有反差，好有效果。
最後為食貓試埋蜜汁雞翼（$42五隻），選用雞中翼而且烤得脆香，雞肉都滑。如果蜜汁可以入到雞肉度，咁就Perfect池啦！
文：Hungry Cat
編輯：macau@openrice.com
隨時接收最新資訊
讚好OpenRice專頁！
Keyword
貓
Cafe
意粉
小食
Copied to Clipboard